2025 жылдың 12 қыркүйегінде Алматы қаласында өткен SHOESSTAR-ASIA аяқ киім мен былғары галантереяны көтерме сатып алу бойынша халықаралық көрменің іскерлік бағдарламасына Tañba Бірыңғай тауарларды таңбалау және қадағалау бойынша оператор қатысты. Аяқ киімді таңбалау жобасының жетекшісі Ерлан Қарабаев Қазақстан Республикасында аяқ киімді таңбалау мәселелері бойынша дөңгелек үстел өткізді.
Дөңгелек үстелде Қазақстандағы аяқ киімді таңбалаудың негізгі аспектілері жан-жақты қаралды: ЕАЭО мен ҚР-дың аяқ киімді таңбалауды реттейтін нормативтік-құқықтық базасы, ел ішінде өндіріс кезінде таңбалау ерекшеліктері, сондай-ақ елдер арасындағы трансшекаралық сауда барысында тауар айналымына қатысушылардың өзара әрекеттестігі. Шетелден аяқ киім әкелу кезіндегі таңбалау рәсіміне, кедендік рәсімдеуден кейін таңбалау қоймалары тізіміне енгізу тәртібіне, қалдықтарды таңбалау мен қайта таңбалау, сондай-ақ ТТҚ АЖ жүйесінде таңбалау кодтарын айналымнан шығару мәселелеріне ерекше назар аударылды.
Сондай-ақ, дөңгелек үстелге қатысушылар Қазақстанға аяқ киімді заңсыз әкелудің өзекті мәселелерін және көлеңкелі импорт үлесін азайту бойынша мемлекеттік органдардың шараларын талқылады. Қолданылып жатқан шаралардың қатарында шекарадағы кедендік бақылауды күшейту, таңбаланбаған аяқ киімді сатқаны үшін Әкімшілік құқық бұзушылық туралы кодекске жауапкершілік шараларын енгізу және мемлекеттік органдардың таңбалау талаптарының сақталуын тексеруді ұйымдастыру атап өтілді. Бұл бастамалар аяқ киімнің заңды бизнесі үшін тең бәсекелестікті жасауға бағытталған.
Халықаралық SHOESSTAR-ASIA көрмесі өндірушілерді, көтерме сатып алушыларды және аяқ киім мен былғары галантерея дистрибьюторларын біріктіретін ең ірі салалық іс-шаралардың бірі болып табылады. Көрме жаңа коллекцияларды көрсетуге, іскерлік байланыстарды орнатуға және өңірдегі саланың дамуындағы өзекті мәселелерді талқылауға арналған бірегей платформа ұсынады.
Тауарларды таңбалаудың бірыңғай операторы