«Қазақтелеком» АҚ және Amazon Kuiper ынтымақтастық туралы келісімге қол қойды

Нью-Йоркте, БҰҰ Бас Ассамблеясының аясында «Қазақтелеком» АҚ мен Amazon Kuiper арасында стратегиялық келісімге қол қойылды. Құжатқа сәйкес ұлттық оператор Қазақстанда Kuiper спутниктік интернет қызметтерінің коммерциялық дистрибьюторы мәртебесіне ие болды. Келісімге Қазақстан Республикасы Президенті Қасым-Жомарт Тоқаевтың қатысуымен қол қойылды.

Келісімге «Қазақтелеком» басқарма төрағасы Бағдат Мусин және Project Kuiper компаниясының Worldwide Consumer бағытының жетекшісі Лиза Скалпоне қол қойды. Құжатқа сәйкес, «Қазақтелеком» қызметтерді бөлшек, корпоративтік, сондай-ақ ішінара B2G сегментінде тарату құқығын алады.

Алыс аймақтардағы интернет

Amazon Kuiper 3200-ден астам төмен орбиталы спутниктен тұратын жүйе құрып жатыр. Бұл жүйе интернетпен ең алыс және қолжетімсіз өңірлерді де қамтуға мүмкіндік береді. Келісім аясында Amazon Алматы, Ақкөл және Ақтауда жерүсті инфрақұрылымын салуға инвестиция салып, Қазақстанда өз қатысу нүктесін ашады.

«Жоғары жылдамдықты спутниктік интернет Қазақстанның бүкіл аумағын қамтып, ауылдық елді мекендерде, өнеркәсіптік аймақтарда, көлік дәліздерінде және әлеуметтік инфрақұрылым нысандарында қолжетімді болады. Amazon Kuiper компаниясымен қол қойылған біздің келісім – елдің цифрлық инфрақұрылымын дамытуға жасалған тағы бір қадам», – деді «Қазақтелеком» АҚ басқарма төрағасы Бағдат Мусин.

Amazon-ның өңірдегі алғашқы ірі инвестициясы

Бұл келісім Қазақстан үшін MAGAM деңгейіндегі (Microsoft, Apple, Google, Amazon, Meta) жаһандық технологиялық алпауыттың алғашқы ірі инвестициясына айналды. Project Kuiper бүгінде орбитаға 100-ден астам спутник шығарды және алғашқы қызметтерді іске қосар алдындағы өндіріс пен ұшыру қарқынын арттыруда.

Amazon Kuiper Қазақстан Республикасының Жасанды интеллект және цифрлық даму министрлігімен бірлесе отырып, байланыс қызметтерін көрсету жөніндегі ұлттық ережелерге толық сәйкестікті қамтамасыз етуді жоспарлап отыр. Жобаны «Самұрық-Қазына» қоры да қолдады және Kuiper технологияларын ұлттық компанияларда қолдану мүмкіндігін қарастыруда.

«Project Kuiper бүкіл әлемдегі клиенттер мен қауымдастықтарға жылдам әрі сенімді интернет ұсыну үшін жасалған. Біз „Қазақтелеком“ сияқты аймақтық серіктестермен ынтымақтаса отырып, қызметті одан да көп жерлерге жеткізуді мақтан тұтамыз. Қазақстанның жасанды интеллект пен цифрлық трансформация саласындағы стратегиясын қолдауға, сондай-ақ елдегі технологиялардың енгізілуіне және экономикалық өсімге үлес қосуға асықпыз», – деді Project Kuiper компаниясының Worldwide Consumer бағытының жетекшісі Лиза Скалпоне.

Технологиялық негіз

Kuiper жобасы төмен орбитадағы спутниктер тобына негізделген. Олар өзара лазерлік оптикалық арналармен байланысқан және ғарышта желілік құрылым құрады. Бұл жүйе Жердегі антенналар, талшықты-оптикалық желілер мен интернет-түйіндер арқылы жаһандық желімен біріктіріледі.